P.VIJAYAKUMAR

Friday, February 17, 2017

                     ഒരിക്കൽക്കൂടി
                     
ഒരേ വരം നിന്നെ-
യടുത്തു കാണുമ്പോൾ,
മഹാദുഃഖാദുഃഖ-
പ്രപഞ്ചചാലക-
പ്രചണ്ഡനിർഝരി!
ഒഴുക്കിലെന്നെ നീ
പിളർക്കുമെങ്കിലും,
ഒടിയുമെല്ലുകൾ
ചിതറുമെങ്കിലും,
കടലാസിൻ തുണ്ടായ്‌
നുറുങ്ങുമെങ്കിലും,
എനിക്കു പ്രാണനാ-
ണുറഞ്ഞു പോം വിധി.
വെറുക്കുവാനാകാ-
വെളിച്ചമാണഴൽ.
ഒരേ വരം നിന്നെ-
യടുത്തു കാണുമ്പോൾ:

വിളർത്ത നക്ഷത്ര-
പ്പനി വിളക്കിന്റെ
ചുവട്ടിലെ രാത്രി
ഒരിക്കലും കൂടി.
കരൾക്കുരുക്കുക-
ളഴിഞ്ഞു പോകാതെ
നുകർന്നുദിക്കുന്ന
പകലൊന്നും കൂടി.

അറിയാപ്പക്ഷി ത-
ന്നലിയും പാട്ടിലെ-
യലയിൽ മുങ്ങുവാ-
നൊരു നാളും കൂടി.
എനിക്കു പിന്നിലു-
ണ്ടൊരുവ, നെന്തിനോ
വിളിക്കയാണവ;-
നവന്നു വേണ്ടിയാ-
ണതിന്നു മാത്രമാ,-
ണൊരുത്തരം വരെ,
ഒരു തീരം വരെ....

വഴികളായിരം
പിരിഞ്ഞു നെഞ്ചിലെൻ
വ്യഥ ജ്വലിക്കുവാ-
നൊരു നാളും കൂടി.                                   
കടലുകളില്ലാ-
ക്കരകൾ കാണുവാൻ,
നുരയെരിയാത്ത
കടലും കാണുവാൻ,
ദിശകളെട്ടിലും
പുകഞ്ഞു പായുവാൻ,
വെറുതെ കത്തുവാ-
നൊരു നാളും കൂടി.

പ്രണയിനി നീട്ടും
തണുത്ത കൈവിരൽ
തളിർത്തു നാഡികൾ
നിറഞ്ഞു പൂക്കുന്ന
വസന്തമെത്തുവാ-
നൊരു നാളും കൂടി.
ജ്വലിക്കുമംബികേ!
നിഴലുറങ്ങുന്ന
ജ്വരപഥങ്ങളി-
ലൊരു പാപം കൂടി.

അലിഞ്ഞു തീരാത്ത
മെഴുതിരികളാം
മിഴികളാലെല്ലാം
തെളിച്ചു കാലത്തെ
ചികഞ്ഞുരുകുവാ,-
നൊരു നാളം കൂടി.

എനിക്കു താങ്ങാത്ത
തിരകളിൽക്കൂടി
പിടഞ്ഞു താണുയർ-
ന്നിടഞ്ഞു നീങ്ങുവാൻ
ഒരു ദിനം കൂടി
ഒരു പകൽ കൂടി
                                         ഒരു സന്ധ്യ....ഒരു...

No comments:

Post a Comment